【連城新天地】深圳福田會展中心、購物公園、崗廈巨型地下街商場！由卓悦中心一路行到星河 CoCoPark

夏天又熱又成日落雨，去邊度行街好呢？今集就同大家行下喺深圳橫跨幾個地鐵站嘅地下商場，連城新天地啦！咁睇下呢張地圖就知啦，連城新天地主要就分為一期同二期，連接深圳地鐵崗廈、會展中心、購物公園同埋高鐵福田站，面績非常非常之大，大家可以由崗廈站嘅卓悦中心一路行到購物公園站嘅CoCoPark，分分鐘行一日都唔完嘅。

今日我地由會展中心站出發，一出站就係連城新天地，右手邊可以通往領展中心城，最近佢哋搞左好多港人優惠，假日呢度嘅香港人分分鐘仲多過大陸人。想知有咩優惠，可以係下面資訊難度睇。

咁我地沿著地下街繼續行，見到噴水池嘅左手邊呢，就係大家最鍾意嘅皇廷廣場架啦。呢個出口一出係H&M嚟嘅，咁唔好俾佢個樣呃左，穿過H&M呢，就入到去皇廷廣場架啦。

好啦，咁繼續行連城新天地呢，就會見到越来越多美食架啦。如果你去到深圳食嚟食去都係海底撈、蛙小俠呢啲大型連鎖餐廳呢，咁就不妨試下呢度比較貼地嘅食肆啦。

咁呢度世界各地唔同口味嘅餐廳都有嘅，甜品、小食、Cafe、茶飲店，就連Hama Sushi、大家樂、大快活呢啲快餐店係度都有分店嘅我都有食過呢度嘅大家樂，真心覺得比香港嘅好食，大家有機會可以試下。

美食街行到盡頭呢，又開始見到有唔少小店啦，都係一啲賣衫賣精品、賣衫嘅鋪項，咁好老實講，值得行嘅地方就唔多架啦！如果想買衫買精品就不如入商場行好過啦～只不過，有果句講果句，夏天又熱又成日落雨，一個商場好快就行完，有啲商場仲有好多露天地方，行都行得特別辛苦嘅，而呢一個連城新天地呢，一條地下街就連接住好幾個商場同地鐵站，完全唔洗上地面同出去，全程嘆住冷氣行街，淨係呢一點已經無得輸啦！

咁再向前行呢，就幾乎行到盡頭，唔經唔覺都行左一個地鐵站架啦，嚟到購物公園站~

咁如果你問我，喺連城新天地最有特色嘅店舖係咩呢，咁我就會投票俾會展中心站一出左手邊嘅MOMO 喜多啦，有招牌葡撻、古早蛋糕、DONUT賣，仲可以入去食個下午茶添嘅，而且你都見到啦，買嘅人係好多嘅，睇到都流晒口水！

好，咁今次條片又差唔多啦，如果你想知道更多深圳商場嘅港人優惠，就要記得訂閱我地嘅YouTube Channel同留意我地Trip Trip Go 處處行嘅網站啦，搜羅深圳商場港人優惠同埋深圳十大酒店推介～記得唔好錯過啦！